«Ազատամարտիկների դաշինքի» անդամ Ռազմիկ Պետրոսյանն (Ապարանցի Ռազմիկ) այսօր լրագրողների հետ զրույցում անդրադառնալով ՂՀ Պաշտպանության բանակի նախկին հրամանատար Սամվել Բաբայանի ձերբակալությանը, հայտարարել է, որ այն ազատամարտիկների վրա ճնշում գործադրելու համար է արվել: «Երկրի համար կյանք տված մարդը չի կարող չարիք դառնալ այդ երկրի համար: Սամվել Բաբայանը չէր թաքցնում, որ սատարում է «Օհանյան-Րաֆֆի- Օսկանյան» դաշինքին: Ես հակված եմ մտածելու, որ այս ձերբակալությունը քաղաքական էր: Եթե հայտնաբերվել էր զենքն ու ահաբեկչությունը կանխվել, պետք է գոնե այս մեկ շաբաթը թաքցվեր դա, որովհետև ընտրություններին հաշված օրեր են մնացել: Ես վստահ ու համոզված եմ, որ Սամվել Բաբայանը չէր կարող որևէ վտանգավոր գործողություն իրականացնել իր երկրի դեմ»:
Ռազմիկ Պետրոսյանի խոսքով՝ Ջրառատի դեպքերից հետո իշխանությունները և իշխանական լրատվամիջոցները դուրս եկան նրա դեմ: Նա իշխանությունների համար հիմնական թիրախն էր, այդ պատճառով էլ նրան մեկուսացրին: