Հրաչյա Հարությունյանի մոտ ուռուցք է հայտնաբերվել
 Մոսկվայում 6 տարի 9 ամիս ազատազրկման դատապարտված, 18 հոգու մահվան պատճառ դարձած «Կամազ» բեռնատարի վարորդ Հրաչյա Հարությունյանի դուստրը` Լիլիթ Հարությունյանը, MAMUL.am-ի թղթակցի հետ զրույցում տեղեկացրեց, որ բժիշկներն օրեր առաջ հետազոտել են Հրաչյա Հարությունյանին և նրա թևատակին հայտնաբերել են ուռուցք: «Ուռուցք են հայտնաբերել, որը պետք է անպայման վիրահատել, բայց բժիշկներն ասում են, որ վիրահատությունը տեղի կունենա այն ժամանակ, երբ եղանակները տաքանան»,- ասաց Լիլիթը: Աղջկա խոսքով` հայրն այս պահին իրեն համեմատաբար լավ է զգում. «Ողնաշարի ճողվածքն էր անհանգստացնում, բայց որոշ բուժումներ է ստացել, ինչի շնորհիվ լավ է զգում»: Արտահանձման հետ կապված` դեռևս տեղաշարժ չկա: «Դեռևս ոչինչ չկա, ու, հավանաբար, չի էլ լինի, նրան չեն էլ տեղափոխի Հայաստան: Մեզ այլևս պատկան մարմինները պարզաբանում չեն տալիս` ինչո՞ւ են նրա տեղափոխման հարցը ձգձգում, ի՞նչն է պատճառը...»: |
