Ուկրաինայի Խարկովի մարզում հրդեհ է բռնկվել երկրի խոշորագույն` Բալակլեայի զինապահեստում: Փրկարար ծառայությունները մարդկանց տարհանել են զինամթերքի պահեստի մերձակա բնակավայրերից: Տարհանվածների թիվը հասնում է 15 հազարի: Զոհերի կամ վիրավորների մասին տեղեկատվություն դեռևս չկա:
Նախնական տվյալներով` հրդեհը բռնկվել է կեսգիշերից հետո` տեղի ժամանակով 3-4-ն ընկած ժամանակահատվածում:
Ուկրաինայի ռազմական դատախազ Անատոլի Մատիոսը գրառում է կատարել ֆեյսբուքյան իր էջում և կատարվածը որակել իբրև դիվերսիա: Ըստ նրա` հրդեհներ բռնկվել են միաժամանակ մի քանի տեղ:
Բալակլեա քաղաքի զինապահեստը խոշորագույնն է Ուկրաինայում. դրա մակերեսը հասնում է 368 հեկտարի: Այնտեղ շուրջ 138 հազար տոննա զինամթերք և հրաձգային ու հրետանային զենքերի փամփուշտներ և արկեր են պահվում: