Միջազգային

Չինաստանում տարածված հնագույն առասպելը, թե գետի հատակում գտնվում են լեգենդար ապստամբ Չժան Սյանչժունի գանձերը, պարզվել է, իրականություն է: Հնագետները Մինյան գետի հատակից դուրս են բերել ավելի քան 10 հազար առարկաներ` պատրաստված ոսկուց ու արծաթից: Բոլորն էլ թվագրվում են Մին դինաստիայի ժամանակաշրջանով (1368 - 1644):

Առասպելի համաձայն` 1646 թվականին ապստամբության ղեկավար Չժան Սյանչժունը հսկայական գանձերը տեղափոխելիս բախում է ունեցել ցինական զորքերի հետ և պարտություն կրել: Ճակատամարտի ժամանակ թանկարժեք իրերով բեռնված մոտ 1000 նավակ խորտակվել է: Մինչ վերջերս պատմաբանները կասկածել են այս պատմության իսկության վրա, սակայն այժմ գտածոները եկել են հաստատելու դրա իրականությունը: Հայտնաբերվել են զարդեր, մետաղադրամներ ու զենքեր:

Առաջին գտածոները գտնվել են 2005-ին, երբ աշխատողները հայտնաբերել են մի քանի արծաթյա ձուլակտորներ: Մի շարք անալիզներից հետո 2010 թվականին այդ վայրը հայտարարվել է հատուկ պաշտպանվող գոտի: Սակայն կասկածների պատճառով պեղումներ չեն իրականացվել: Այնինչ գանձախույզներն ակտիվորեն անցել են աշխատանքի և սուզվելով գետի հատակը` հանել թանկարժեք գտածոները: 2015-ին ոստիկանությունն սկսել է հետապնդել նրանց: Ձերբակալվել է 31 մարդ, բռնագրավվել են հազարավոր ոսկե և արծաթե մետաղադրամներ ու ձուլակտորներ:

2017-ի հունվարին գիտնականներն իրենք են պեղումներ սկսել, մարտի կեսերին արդեն հետազոտված է եղել 10 հազար քառակուսի մ տարածք` հատուկ միջոցներով չորացնելով գետի հունն ադ հատվածում: Գետի հատակը փորվել է 5 մ խորության վրա: Պեղումները կշարունակվեն մինչև այս ապրիլ, և հնարավոր է, դարձյալ անակնկալներ մատուցեն հնագետներին:

Իշխանությունները մտադիր են առաջիկայում այդ վայրին հարակից տարածքում թանգարան բացել: