Շահեն Հարությունյանը ֆեյսբուքյան ասուլիսի ընթացքում հայտարարել է, որ Արթուր Սարգսյանի մահը մոմավառություններով և սգալով չի կարող լուծել այն խնդիրները, որոնք իրենց առջև դրել են Ազատության հրապարակում ամենօրյա ակցիա իրականացնողները: «Միայն այդ քայլերով հարցին լուծում չի տրվի: Կամաց-կամաց համոզվում եմ, որ Հաց բերողին մոռացության են մատնում: Պետք է համախմբվենք և այնպիսի քայլերի դիմենք, որ մեր ձայնը տեղ հասնի, որ ամենակարևորն է` գլխավոր դատախազը հրաժարական տա»,- ասել է Շահենը: Վերջինը տեղեկացրել է, որ քաղաքացիներից շատերն իրենց ակցիաները պիտակավորում են. «Մեզ պիտակավորում են` ասելով, որ լակոտների միություն ենք, պարապների հավաք ենք իրականացնում և այլն: Ցավում եմ այդ մարդկանց համար, և նրանց պետք է ասեմ, որ զարգացած երկրներում երիտասարդներն ազատորեն արտահայտում են իրենց կամքը և մի շարք նախաձեռնություններ են իրականացնում»:
Անդրադառնալով հոր` Շանթ Հարությունյանի տարածած հայտարարությանը, Շահենն ասել է. «Բոլորս պետք է գիտակցենք, որ եթե Ազատության հրապարակում հավաքվի բազմություն, ապա իմ նկատմամբ որևէ բան չի լինի, իսկ հակառակ դեպքում ամեն բան էլ սպասելի է»: