«Եթե Հայաստանն այդքան խելացի է, ինչո՞ւ է այդքան աղքատ». Ալիևի ճառն ու հայկական կողմի պատասխանը
 Ադրբեջանի նախագահ Իլհամ Ալիևը երեկ ֆրանսիացի գործարարների հետ հանդիպման ընթացքում իր ափսոսանքն է հայտնել, որ որոշ ֆրանսիական ընկերություններ գործունեություն են ծավալում «Ադրբեջանի օկուպացված տարածքներում». «Դա խախտում է մեր օրենսդրությունն, ինչպես նաև` միջազգային իրավունքը: Ադրբեջանը լուրջ քայլեր է ձեռնարկում այս հարցը միջազգային հարթակում բարձրացնելու համար: Դիմումներ են արվում միջազգային դատարաններին: Ուստի ես կոչ եմ անում այդ ընկերություններին` զերծ մնալ օկուպացված տարածքներում ապօրինի գործունեությունից: Դա մեծ գումարներ չի բերի, բայց կստեղծի մեծ խնդիրներ»: Նա նաև անդրադարձել էր մի քանի օր առաջ MEDEF-ում Սերժ Սարգսյանի հնչեցրած խոսքին: «Սարգսյանը խոսում էր նորարարությունների մասին, իբրև թե Հայաստանը նորարարությունների երկիր է: Ճիշտն ասած` մենք Ադրբեջանում մի լավ ծիծաղեցինք դրա վրա: Մի ասացվածք կա` եթե այդքան խելացի ես, ինչու ես այդքան աղքատ: Ֆրանսիական ընկերություններին հեքիաթներ պատմելու փոխարեն Հայաստանի նախագահը պետք է իր ուշադրությունը կենտրոնացներ Հայաստանի սարսափելի տնտեսական դրության վրա, որի բնակչության մեծ մասն աղքատության շեմից անդին է: Նրանց իսկ պաշտոնական վիճակագրությամբ` ամեն տարի Հայաստանը լքում է 60 հազար, մեր ունեցած տվյալներով` 100 հազար մարդ: Եթե այդ երկիրն իրոք գրավիչ լիներ, ապա մարդիկ կմնային, ոչ թե կփախչեին այդտեղից»,- ասել է Ալիևը: Այս կապակցությամբ ՀՀ ԱԺ արտաքին հարաբերությունների մշտական հանձնաժողովի նախագահ, Եվրանեսթ խորհրդարանական վեհաժողովի փոխնախագահ Արտակ Զաքարյանը ֆեյսբուքյան իր էջում գրել է. «Իլհամ Ալիևի ուղեղն ու հիշողությունը կարծես հեռագիր լինեն` կարճ ու սխալներով: Ես հակադարձ հարց ունեմ` եթե դու այդքան հարուստ ես, ինչու ես քո ժողովրդին աղքատության մեջ պահում, ինչու ես խեղդում նրա իրավունքները հանուն քո ընտանեկան կլանի և ինչու ես վախկոտաբար սարսափեցնում նրան արցախյան հարցով»: |
