Իրադարձություններ

Փետրվարի 26-ին Կ. Ստանիսլավսկու անվան ռուսական դրամատիկական թատրոնում կայացավ Ա. Ցագարելիի «Խանումա» հոբելյանական ներկայացման ցուցադրությունը: Ներկայացման բեմադրիչ, թատրոնի գեղարվեստական ղեկավար Ալեքսանդր Գրիգորյանի խոսքով` այն թվով 800-րդն է: Նրա փոխանցմամբ՝ առաջին անգամ «Խանումա» ներկայացումը ռուսական թատրոնի բեմ բարձրացել է 1975-ին:
     «Ունիկալ ներկայացում: Այն հյուրախաղերով հանդես է եկել ՌԴ, Ուկրաինայի տարբեր քաղաքներում և ամենուր մեծ ոգևորությամբ է ընդունվել: Յուրաքանչյուր անգամ հանդիսասրահը, բառի բուն իմաստով, պայթում է ծափերի տարափից»,- պատմում է Ալեքսանդր Գրիգորյանը: Բեմադրիչն ընդգծում է, որ «Խանուման» խաղացանկային ներկայացում է, և մինչ օրս հանդիսատեսի պակաս չունի, իսկ դա, ինչու ոչ, հպարատանալու առիթ է: «Այն մեծ մասսայականություն է վայելում. ներկայացումը մշտապես խաղացվում է լեփ-լեցուն դահլիճներում: Դերասանները ջանք ու եռանդ չեն խնայում: Նրանք իրենց անկեղծ ու վարակիչ խաղով գրավում են հանդիսականին առաջին իսկ րոպեներից, ու մի պահ, գուցե, կտրում հոգսաշատ առօրյայից»,- նշեց բեմադրիչը: